Amritsar-a bomb puakah mi pathum thi

Amritsar, Punjab-a Rajasansi khuaa Nirankari Bhawan-ah nimin khan bomb a puak a, mi pathum an thi a, midang eng emaw zatin hliam an tuar.

Bomb hi sakhaw pawl pakhat, Niranki ten inkhawm an neih laia tihpuah a ni.

Mita hmutute chuan mi pahnih, bike-a chuangte chuan inkhawm neih laiin Nirankari Bhawan complex chhungah bomb hi an vawm lut niin an sawi. He pawikhawihna thlen lai hian complex chhungah hian mi 250 vel an awm niin Inspector-General of Police (Border) Surinder Pal Singh Parmar chuan a sawi.

Rajasani hi Amritsar-a international airport bula awm a ni a, Indian Air Force station pawh an khaw bul lawkah a awm a ni. Punjab-ah hian Nikarani pawl hi maktaduai tel an awm a ni.

Bomb puaka hliam tuarte hi damdawi in hrang hrangah hruai nghal an ni a, an zinga pali chu an dinhmun a ṭha lo hle.

Police-te chuan pawikhawihtute hi an zawng nghal tih an sawi. Chief Minister Amarinder Singh pawhin an state chhunga dan leh thupek dinhmunte enfiahin top official-te chu meeting a neihpui nghal bawk. CM chuan home secretary, DGP, DG (Law and Order) leh DG Intelligence te chu thil awmdan enfiah tura Rajasani khuaa kal nghal turin a ti.

CM chuan Amitsar-a bomb puaka thi chhhungte leh hliam tuarte a tuarpui thu a twitter-ah a tarlang. Thi chhungte chu cheng nuai nga ṭheuh pek an ni dawn a, hliam tuarte chu an inekawlna senso sorkarin a tumsak dawn bawk a ni.