Congress hotuah Nehru family aṭangin paruk chauh awm : Chidambaram

Prime Minister Narendra Modi-an Congress party chuan an party hruaitu atan Nehru-Gandhi chhungkaw pawn lam mi an dah a ngai tawh a ni tia sawi chu chhang letin, Union Minister hlui P Chidambaram chuan an party president hlui zawngte hming dahchhuakin, party president 60 an neih tawh zingah Nehru-Gandhi chhungkaw mi chu paruk chauh an nih thu a sawi.

Chidambaram hian a twitter-ah Congress party din a nih aṭanga an party president lo ni tawhte hming tarlangin, an party chu chhungkaw pakhat ta bil a nih loh thu a sawi.

Hemi rual hian PM chuan hetiang thil buaipui lo a, tunlaia rampuma buapui mek - GST, Rafale aircraft deal, hna nei lo pung zel leh loneitute harsatna tawh vanga intihlum pung zel chungchang chu ngaihtuah zawk turin a ti zui bawk. Modi-an Congress president atan tunge thlan a ni tihte buaipuia a ngaihven chu a lawmawm rualin, hemi chungchang sawia a hun a sen zahve tal chu ram pum huap buaina neih mek chungchang sawina atana hmang zawk turin a duh tih a sawi.