Rahul-an Rafale Deal chungchanga debate neihpuiah PM a cho

Congress president Rahul Gandhi chuan sorkar laipuiin Rafale fighter jet lei tura France sorkar inremna a siampui danah Prime Minister Narendra Modi chu debate neihpuiah a cho.

Rahul Gandhi chuan Rafale deal siam danah thil fel tawk lo awm chungchanga zawhna a neihte chu PM hian a chhan theih a ring lo tih a sawi.

Gandhi chuan, "PM Modi hi eng hunah pawh, khawi hmunah pawh minute 15 chhung chauh Rafale chungchang debate neihpui turin ka cho a ni. Anil Ambani, HAL, France President thusawi leh jet man chungchang ka sawi dawn a ni. Defence Minister pawhin a titu tak chu Prime Minister a nih thu a lo sawichian thu pawh ka sawi dawn. Prime Minister hian inremna siamna tur hian dan a zawm lo a ni. CBI Director chu zinglam dar 2-ah chawlhtir a ni. PM hian ka zawhna hi a chhang thei lo ang", a ti.

Congress hotu chuan PM Modi-an pawisa note lian pahnih a tihthih chu sumdawngmi a ṭhianṭha zual mi tlemte chauhin an hlawkpui a, ram pumah mipui nawlpui tan harsatna a thlen thung tih a sawi.

Chhattigarh-ah hna nei lo pung chak zel chungchang pawh sawi-chhuakin, Gandhi chuan Chief Minister Raman Singh chuan kum 15 zet state-ah ro a rel chungin hna a siam thei lo tih a sawi, PM Modi pawh cnetral-ah kum li leh a chanve a sorkar tawh bawk a, heng sorkar pahnihte hian ṭhalaite tana hna tam zawk siam an lo tiam tawh chu an tipuitling thei lo ve ve a ni, a ti.

Congress party hotu chuan Chhattisgarh-ah an party in sorkarna an siam a nih chuan sorkar thar a din aṭanga ni 10 chhungin loneitute loan ba ngaihdam a tiam a, hei bakah hian bonus pek vek a tiam bawk. Chhattisgarh-ah hian November 12 khan inthlan thawh khatna neih a ni tawh a, a thawh hnihna chu November 20 hian neih a ni ang.