J&K-ah firfiak pahnih kaphlum

Jammu and Kashmir-a Shopian district-ah nimin zing khan security force-ten firfiak pahnih an kaphlum.

Security force leh J&K police-te chuan Zainapora-a Rebban area-ah firfiak an awm tih thu an dawn avangin beihpui an thlak nghal a, an dap laiin firfiakten hian security force-te hi lo bei hmasain an inkap zui ta a ni. Firfiak pahnih kahhlum niin, an ruanga pawh lak nghal a ni a, an awmna hmunah hian AK-47 pakhat leh pistol pakhat hmuh a ni bawk.

Kar kalta Inrinni khan Shopoian district-ah firfiakten tlangval kum 19 mi an that a, a nghawngah zai niin a ruang hi Hermain khuaah hmu a ni. Firfiakte hian Pulwama-a Niklora-ah Class 11 zirlai pakhat Nadeem Manzoor pawh ruboin, an that zui bawk. Hizbul Mujahideen firfiak pawl chuan Manzoor hi sipaite hnena an chanchin hrilhtu a nih vanga thah a nih thu sawiin, thah a nih lai video hi an tichhuak bawk.