March 16 aṭangin kum 12-14 inkarte vaccine pe ṭan dawn ; Kum 60 chunglamten booster dose an la vek thei

Union health minister Mansukh Mandaviya chuan naktuk, March 16 aṭangin ram chhunga naupang kum 12-14 inkarte Covid-19 vaccine pek ṭan an ni dawn tih a puang. Hei bakah hian booster, precaution dose la thei, kum 60 chunglam natna benvawn nei tih chu siam ṭhain, kum 60 chunglam tu pawhin booster dose hi an an la thei dawn bawk.

Health Ministry thuchhuah chuan, "Sorkar laipui leh scientific body-ten ngun taka an ngaihtuah hnuah, Covid-19 vaccine chu kum 12-14 inkarte tan March 16, 2022 aṭangin pekchhuah a tum a ni," a ti. Kum 12-14 inkarte hnena Covid-19 vaccine pek tur hi Hyderabad-a Biological Evans siam, Corbevax a ni ang.

Minister Mandaviya chua, naupangte an him chuan ram a him a ni, tiin naupangte tana vaccine pek chhuah a ni thei tur leh, kum 60 chunglam zawng zawngten precaution dose an la thei tur chu lawmawm a tih thu a sawi. A la thei chin chu vaccine hi la vek turin a ngen nghal bawk.

Nikum January 16 aṭang khan ram pumah Covid vaccine pek chhuah hi kalpui ṭan a ni a, a thawh khatnaah hian healthcare worker-te pek an ni. February 2, 2021 aṭangin forntline worker-te pek ṭan an ni leh a, March 1-ah kum 60 chunglam leh kum 45 chin, natna benvawn neite tan pek chhuah a ni leh bawk.

Kum 2021, April 1-ah kum 45 chunglamte hnena Covid-19 vaccine hi pek a ni a, hemi kum May 1-ah kum 18 chunglamte pek an ni. Kumin January 3 khan tleirawl, kum 15-18 inkarte pek ni ve lehin, January 10 khan booster dose, precaution dose tia sawi chu healthcare worker, frontline worker, election duty leh kum 60 chunglam natna benvawn neite pek an ni leh bawk a ni.

Nimin zing thleng khan India ramah Covid vaccine hi dose vaibelchhe 180.19 pek chhuah a ni tawh a, state/UT hrang hrangten vaccine an kawl hi dose vaibelchhe 17.38 chuang a la awm bawk niin Health Ministry chuan a tarlang.

India ramah hri lengin ziaawm lam a pan zel a, hri kai thar pawh a tlahniam tawh hle. Pathianni khan ram pumah Covid hri kai hmuh chhuah thar mi 2,503 awmin, ni 680 chhunga ni khata hri kai tlem ber ṭum a ni. Hemi ni vek hian hripui vanga thi mi 27 an awm bawk.

Hri kai mek, active case pawh 36,168-ah a tla thla tawh a, ni 675 chhunga a hniam ber ṭum a ni. Hetih lai hian ram pumah hri vanga thi hi mi 5,15,877 an tling tawh a ni.