March 27 aṭangin international flight 100% capacity-in thlawk thei tawh dawn

Covid-19 hri leng avanga kum hnih chhung zin veivah kawnga khuahkhirhna siamte chu thlahdul chhoh zel a ni a, March 27 aṭangin international flight zawng zawng pawh 100% capacity-a an thlawh phalsak a ni tawh dawn tih Aviation Ministry chuan a sawi.

Khawvel ram hrang hranga Covid hri leng avangin kum 2020, March 23 khan sorkar laipui chuan international flight service a titawp a, mahse hemi kum July thla aṭangin ram 35-ah special international flight a thlawh tir a ni. Hemi hnuah hri lengin ziaawm lam a pan chhoh hnuah khuahkhirhna siamte pawh thlahdul chhoh zel niin, March 27 aṭang chuan hri len hmaa an kaldan phung pangngai angin an kal leh thei tawh dawn tih union civil aviation minister Jyotiraditya Scindia chuan a sawi a ni.

Union minister chuan Ukraine aṭanga India mite hruaichhuah hna kalpui mek chungchang pawh sawiin, Ukraine ṭhenawm - Romania, Moldova, Slovakia leh Poland ram hruaitute pawh biakpawh reng an nih thu a sawi. Heng ram aṭang hian indo thlenna, Ukraine rama India mi, a bikin zirlai la awmte chu Operation Ganga kalpui mek hnuaiah hruaichhuah dan tur ruahman a ni, a ti. Indian zirlaite bakah, Pakistan, Bangladesh leh Nepal aṭanga kal mi eng emaw zat hruaichhuah tel an ni bawk niin Minister chuan a sawi.