Vawiin-ah Chhattisgarh inthlan thawh hnihna

Chhattisgarh assembly inthlan thawh hnihna leh a tawpna tur chu vawiin hian district 19-a assembly bial 72-ah neih a ni dawn. Inthlan thawh khatna hi November 12 khan Naxal hluarna, bial 18-ah neih a lo ni tawh a ni.

Vawiina bial 72-a inthlanna neih turah hian candidate 1,101 an awm a, an zingah hian cabinet minister ni lai pakua bakah, party lian BJP leh Congress hruaitu lar tak takte an tel.

Inthlan muanawm leh felfai tak a awm theihna turin venhimna lam pawh tihkhauh a ni a, venhim hna thawk tur hian sipai nuai khat chuang dah an ni.

Chhattisgarh-a rorellai, BJP chuan a term li-na atana thuneihna chan chhunzawm leh tumin theihtawp a chhuah a, hetihlai hian Congress party chuan kum 15 zet BJP rorelna hnuaia an awm chu tihtawp a tum ve bawk. Party pahnihte hian bial 72-ah candidate an dah vek a ni.

Vote hi zing dar 8 aṭanga tlai dar 5 thleng thlak theih a ni ang. Bial 72-ah hian vote nei mi 1,53,85,983 an awm a, an zinga 77,46,628 chu mipa niin, hmeichhia 76,38,415 an awm a, third gender 940 an awm bawk. Vote thlakna tur polling station 19,296 siam a ni.

Vawiina inthlanna neih tura candidate tamna ber chu Raipur City South constituency a ni a, candidate 46 an awm. Candidate tlemna ber Bindrana-vagarh-ah chuan paruk an awm thung. Seat 72 zingah seat 46 chu general category a ni a, Scheduled Caste tan seat pakua dah niin, Scheduled Tribe tan 17 dah a ni bawk.