Maldives-in India helicopter pek hman chhunzawm dawn

Maldives President thar Ibrahim Mohamed Solih lakluh a nih hnu lawkah, Maldives Defence Minister thar Mariya Didi chuan India-in an ram tana helicopter pahnih a lo pek tawh chu pekkir a ni dawn lo a, an hman chhunzawm zel dawn tih a sawi.

Maldives president hlui Abdulla Yameen khan India sorkar hnenah helicopter a pekte chu lakir leh vek turin a lo ti tawh a ni.

Mahse defence minister thar chuan miin duhsaka thil an pek tawh lakir leh tura tih chu an ram tihdan phung a ni ngai lo tih a sawi. Chopper pakhat Maldives chhim lama Addu thliakarah dah a ni a, pakhat hi Laamu-ah dah a ni thung. Heng helicopter-te hi kum 2013-a Maldives sorkarin a ngen anga pek an ni.

Mariya chuan helicopter te hi ṭangkai taka hman an ni dawn tih sawiin, damdawi lam thilah leh, mi zawn leh chhanchhuah hna thawhna atante hman an ni ang, a ti. Maldives ambassador hlui Ahmed Mohamed pawhin a hma pawhin heng helicopter te hi an hmang ṭangkai hle tih a sawi.

President hlui Mohamed Nasheed chuan Yameen-an India hnena helicopter lalet tura a tih leh, India leh Maldives inkar boruak tihchhiat tumnaah hian China a inrawlh niin a sawi a, Yameen pawh hi pawn lam aṭanga nawrtu an awm a ni, a ti.

Maldives President Solih lakluh inkhawm hi Prime Minister Narendra Modi pawhin a hmanpui a ni. He inkhawma tel tura Head of state/government sawm awmchhun chu India a ni.