Eptu pawlten Nov 22-ah meeting nei dawn

Eptu party hrang hrangte chuan kum 2019 Lok Sabha inthlanpui neih turah BJP kaihhruai National Democratic Alliance paihthlak a nih theihna tura thawhho dan tur an ngaihtuah mek a, November 22 hian Delhi-ah meeting an nei dawn.

Andhra Pradesh Chief Minister Chandrababu Naidu chuan nimin khan West Bengal Chief Minister Mamata Banerjee-i chu hmuin meeeting-a tel tur hian a sawm. Naidu leh Banerjee te hi Howrah-a state secretariat-ah an inhmu a ni.

November 22-a meeting neih turah hian anti-Bharatiya Janata Party (BJP) forum siam tur leh hmalak chhoh dan turte chu an ngaihtuah ber tur a ni. Hei bakah hian PM Narendra Modi-a kaihhruai sorkarin mipuite harsatna thlen zawng policy hrang hrang a kalpui te beih let dan turte an duang bawk ang. BJP kaihhruai NDA sorkar chu official agency- Central Bureau of Investigation (CBI) leh income tax department-te chu politics lama hamṭhatna a hmuh theihna tur leh an hmelmate tihchhiatna tura hmangah an puh a, hei bakah hian institution dangte hnathawk thei loa an siam leh, pawisa note an tihthih ten nghawng ṭha lo a neih dante pawh an sawilang dawn a ni.

Naidu hian eptu ṭangrual pawl siam a nih theihna atan hian eptu party hrang hrang hruaitute pawh a lo hmu kual tawh a, Rahul Gandhi, Bahujan Samaj Party president Mayawati, Samajwadi Party chief Akhilesh Yadav leh a pa Mulayam Singh Yadav, Delhi chief minister leh Aam Aadmi Party chief Arvind Kejriwal, Nationalist Congress Party president Sharad Pawar, National Conference chief Farooq Abdullah, Dravida Munnetra Kazhgam (DMK) leader MK Stalin leh Communist Party of India leh Communist Party of India (Marxist) hruaitute pawh a lo kawm tawh bawk.

Bengaluru-ah Karnataka chief minister, Janata Dal (Secular) hruaitu HD Kumaraswamy leh a pa, prime minister hlui HD Deve Gowda te pawh a hmu bawk a ni.