Emergency lai aiin Modi-a hnuaiah ram dinhmun a chhe zawk : Arun Shourie

Union Minister hlui Arun Shourie chuan Prime Minister hlui Indira Gandhi-in Emergency a lo puang kha amah ngei pawh a hnuah a inchhir a, mahse kum 1975-77 a India ram dinhmun khirh taka a awm lai ai khan Prime Minister Narendra Modi-a kaihhruaina hnuai­a India dinhmun chu ala chhe zawk a ni, a ti.

Arun Shourie chuan Modi-an India ram a ti­chhe zel tur ven a, lo dan theihna chu kum 2019 Lok Sabha inthlanpui neih turah eptu party hrang hrangte an ṭanrual a, BJP an paihthlak a ngai a ni, tiin a sawi. Hemi atan hian eptute chu inlungrual a, BJP beilet tura candidate inṭawm an siam a ngai tih a sawi.

Mumbai-a Tata Literature Festival neihnaa 'Danger within the Judicial System' session-a thu a sawiah, Shourie chuan, " Kum 1975, Emergency hnuaia awm lai khan tun aiin eptu lam an ṭha zawk a ni. Tunah chuan eptu lam hi an darhsak lutuk a ni. Indira Gandhi leh Narendra Modi danglamna chu Gandhi-i khan a thiltih avang khan inchhirna a nei a, vawiinah erawh chuan inchhirna hmel a lang lo", a ti. "Gandhi khan emergency hunlai khan mi 1,75,000 zet jail-ah dah mah se, bithliah chin a nei thung. Tunah chuan bithliah engmah a awm tawh lo" tiin a sawi.

Shourie chuan 2019-a PM Modi hneh theihna tur pawimawh chu eptu ṭanrualna a ni tih a sawi a, Modi-a lar vanglai, a thli a tleh an tih lai pawh khan vote a hmuh zat chu 39% a ni a, eptu pawl hrang hrangte an ṭanrual chuan vote 69% in bul an ṭan nghal dawn a ni, a ti.