Karnataka HC-in zirna inah hijab a khap chhunzawm

Karnataka High Court chuan nimin khan state chhunga zirna ina hijap khap chu kalpui chhunzawm zel tura thupek siamin, hijap khap chungchanga petition eng emaw zat lut chu a hnawl nghal bawk. High Court chuan hijab inbel chu Islam sakhuaah tih ngei ngei tur zinga mi a ni lo, a ti.

HC-in hijap khapna thupek a tihchhuah hnu hian Karnataka chief minister Basavaraj Bommai chuan mipuite chu boruak ṭha siam turin a ngen nghal bawk. "Zirlaite chuan High Court thupek hi zawmin, class leh examination-te an boycott tur a ni lo. Court thupek siam ang hian kan kal dawn a, mahni thua dan lekkawh lo tumte chungah action na takin kan la zel ang," tiin a sawi.

February 10 khan High Court chuan interim order tichhuakin, final order tihchhuah a nih hma chuan zirlaite chu zirna inah saffron shawl, bhagwa scarf, hijab te inbel lo tur leh, sakhaw kaihhnawih thil flag leh thil dangte pawh classroom-a la lut lo turin a ti a ni.

All India Majlis-e-Ittehadul Mus­limeen (AIMIM) hotu Asaduddin Owaisi chuan High Court thupek chu sawiselin, hei hi sakhaw zalenna palzutna a ni tiin, he thupek hian Muslim hmeichhiateah nghawng ṭha lo tak a nei dawn a ni, a ti. Jammu and Kashmir chief minister hlui, PDP hotu Mehbooba Mufti pawhin Karnataka High Court thurel dan chu pawi a tih thu sawiin, "Hmeichhiate thuam chak chungchang kan sawi mek laiin, kawng lehlamah an duhthlanna neih chu kan phalsak leh chuang silo a ni. He thil hi sakhaw thil lam ringawt ni loin, mimalin duhthlanna tura zalenna a neih chungchang a ni," a ti. Karnataka Congress MP DK Suresh pawhin Constitution ngei pawhin Islam sakhua a pawm laiin, High Court-in hetiang zawnga thupek a siam mai chu mak a tih thu a sawi ve bawk.