Rajnath Singh-a'n missile kah chungchang sawifiah

Union defence minister Rajnath Singh chuan nimina Rajya Sabha rorel inkhawmah, tun hnaia Pakistan rama tihpalh thila missile kah chhuah a nih chungchang sawifiahin, India chuan a weapon system-te himna chu a ngai pawimawh hle a ni, a ti.

Rajnath Singh chuan India missile system chu an him ṭha tawk hle tih a sawi a, hemi rual hian March 9-a thil thleng chungchang a sawifiah. Minister chuan, "Tihdan phung pangngai anga inspection neih laiin zan dar 7 velah missile chu kah chhuah palh a ni. A hnuah he missile hi Pakistan ram chhungah a tla tih hriat a ni zui bawk. He thil thleng hi pawi kan ti hle a, hemi rual hian chetsualna thlenga mi tumah hliam an awm lo erawh a lawmawm hle a ni," tiin a sawi.

Defence Ministry chuan sorkar laipui pawhin he chetsualna thleng hi a ngai thutak hle a, court of enquiry nei turin thupek pawh a tichhuak nghal tih a sawi.

Hetih lai hian Pakistan chu an rama missile kah luh anih chungchangah a lungawi lo hle a, India lamin tihsual palh nia a insawifiahna chu a lungawi thlak tawk lo tih Pakistan Foreign Office (FO) chuan sawiin, ram pahnihten he thil thleng hi an chhui dun an phut tih an sawi bawk. FO hian Indian Charge d'Affaires pawh ko in, an airspace palzut sak an nih dana an lungawi loh thu leh, he thil thleng hian India-in air safety lam a dah pawimawh tawk loh ziate a tilang a ni, a ti.

China chuan India leh Pakistan chu inbiakna nei thuai tur leh, missile kahchhuah a nih dan pawh uluk taka chhui dun turin a ti. China foreign ministry thupuangtu, Zhao Lijian chuan South Asia-ah India leh Pakistan chu ram pawimawh tak an ni a, hei vang hian boruak ṭha leh security chungchangah mawhphurhna an nei ve ve a ni, tiin a sawi. Hetiang thil a thlen nawn tawh lohna turin ram pahnihte chu information-te inhrilh tawn a, inhriatthiam tawnna an neih theihna tura inbe turin a ngen a ni.