Goa MLA tharten rinawmna thu tiam

Goa Assembly member thlan tharte chu nimin khan rinawmna thu tiamtira lakluh an ni. Governor PS Sreedharan Pillai chuan Thawhṭanni khan MLA Ganesh Gaonkar chu pro-tem speakar atan rinawmna thu tiamtirin a lo la lut tawh a, nimin khan pro-tem speaker hian MLA dangte chu thu a tiamtir ve leh a ni.

Seat 40 awmna, Goa Assembly inthlan hi February 14 khan neih a ni a, BJP chu party mala seat la hnem niin seat 20 a la. Mahse member pakhatin majority a nei pha lo a, hei vang hian sorkar siam turin midang a thawhpui a ngai dawn ta a ni. MLA tharte hian Konkani, Marathi leh English-in, an duh thlan berin rinawmna thu hi an tiam.

Congress senior leader Digambar Kamat chuan an state-ah sorkar siam a nih hmaa MLA te lakluh an nih ṭum khatna a nih thu a sawi.

Goa BJP president Sadanant Shet Tanavade chuan BJP sorkar thar hi March 18-a Holi hman zawh hnua lakluh a ni dawn tih a sawi. Goa rual hian BJP sorkarna tur state pathum, Manipur, Uttarakhand leh Uttar Pradesh-ah pawh Holi zawhah sorkar thar hi lakluh an ni dawn bawk tih a sawi a, mahse a ni tak erawh a sawilang lo.

Goa chief minister tur hi tihfel a la ni lo a, BJP central hruaituten an la ruat dawn a ni. Health minister hlui Vishwajit Rane chu CM thar tura sawi langsar ber a ni.