Facebook-in ads tihna manah party dang aiin BJP a tihtlawm sak

India rama non-profit media organisation, The Reporters' Collective (TRC) leh social media-a political advertisement chungchang zirchianna project, ad.watch-te data tihchhuah chuan, thla 22 chhunga political party-ten advertisement an tihnaah Facebook chuan party dang aiin BJP chu a tihtlawm sak bik hle tih a tarlang.

BJP-te tana adverstisement man an tihtlawm sak vang hian sum tlem zawk sengin voter tam zawk an thleng phak a, hei hian election campaign-naah pawh a pui hle niin a lang. Thla 22 huam chhungah hian election ṭum 10 a awm hman a, heng zingah hian kum 2019-a BJP an chakna, national parliamentary election pawh a tel a ni.

Data hi Ad Library Application Programming Interface (API) aṭanga a lakkhawm a ni. Kum 2019, February leh November, 2020 inkar khan Facebook-ah political advertisement hi 536,070 a awm a ni.

Facebook hian BJP, an party candidate leh an hnuaia organisation-te tan advertisement pakhat, million view an tlin theihna turin Rs 41,844 (USD 546) a laksak a, hetih lai hian eptu party, Congress party tan chuan hemi zat view nei tur hian advertisement pakhatah Rs 53,776 (USD 701) a laksak thung a, BJP aiin a sum chawi hi 29% dawnin a tam.

TRC leh ad.watch hian BJP leh Congress adverstisement tih bikte hi a khaikhin a, thla 22 chhungin BJP leh a hnuaia pawl dangten an official page kaltlanga adverstiment tihna atana a an sum sen hi Rs mtd 104.1 (USD mtd 1.36) vel a nih laiin, Congress leh a hnuaia pawl dangten an sum chawi hi Rs mtd 64.4 (USD 841,000) a ni. BJP rate ang hian laksak ve se Rs vbc 11.7 velin a sum sen hi a hniam phah ang.

Facebook hian advertiser tam tak BJP fakna lam hawi tihchhuah phalsakin, nasa takin a boost sak bawk a, hetih lai hian party dang leh an candidate fakna lam hawi tihchhuah tum tam zawk erawh a block thung. BJP fakna tichhuaktute chu million view atan Rs 39,552 chawitirin, Congress party fakna lam tichhuaktute erawh Rs 52,150 chawitir an ni a, BJP aiin an chawi zat hi 32% dawnin a tam zawk.

He data tihchhuah hian Supreme Court-in Facebook policy leh algorithm-te chuan electoral politics leh democracy dinhmun a tiderthawng thei nia a lo sawi tawh chu a rawn nemghet ta nia ngaih a ni. Nikum July thla khan Supreme Court chuan inthlan leh vote thlak kalpui dan, democratic sorkar innghahna lungphum ber chu social media hman dik lohna chuan a tiderthawng thei tiin a lo sawi tawh a ni.