Punjab CM thar atan Bhagwant Mann lalut

Punjab chief minister thar atan Aam Aadmi Party (AAP) hruaitu Bhagwant Mann chu nimin khan rinawmna thu tiam tira lakluh a ni ta.

Kum 48 mi, Bhagwant Mann hi freedom fighter Bhagat Singh-a khua, Nagar disrict-a Khatkar Khan khuaah CM atan hian lakluh a ni. Lakluh a nih hmain Mann hian state mipuite chu lakluh inkhawmah hian tel vek turin a lo sawm tawh a, amah chauh ni loin Punjab mipui vaibelchhe thumte chuan rinawmna thu hi an tiam dawn a ni, tiin a sawi.

CM lakluh inkhawm hi AAP covenor, Delhi chief minister Arvind Kejriwal chuan a hmanpui a ni. Lakluh anih hnua thu a sawiah, CM Mann chuan an state tan hun rangkachak a rawn inṭan tih sawiin, mitin tan a thawk dawn tih a sawi. "Punjab-a mi zawng zawng tan, kan party vote ve lo te tan pawh Chief Minister ka ni," tiin nikhat pawh awmze nei loa khawhral a tum lo a, state tan a thawk ṭan nghal dawn tih a sawi.

Chief Minister cabinet member turte chu Inrinni hian Chandigarh-a Raj Bhavan-ah lakluh an ni ang.

Tunge Bhagwant Mann?
Punjab-a AAP sorkar ding tura Chief Minister tur, Bhagwant Mann hi comedian aṭanga politician-a inlet a ni. Kum 1973-ah piangin, kum 2011 khan politics lamah a lut ṭan a, Manpreet Singh Badal kaihhruai Punjab People's Party a zawm. Kum 2013 khan assembly inthlanah a chuh ve nghal a, mahse a tling zo lo.

Kum 2014 khan Arvind Kejriwal-a kaihhruai AAP zawmin, Lok Sabha inthlanpuiah Sangur bialah thlan tlin a ni. He inthlanah hian Punjan veteran leader, Sukhdev Singh Dhindsa a hneh avangin ngaihven pawh a hlawh zui hle. Kum 2019 inthlanpuiah khan Sangur bialah bawk hian Lok Sabha member atan thlan nawn leh a ni.

Punjab assembly inthlanah khan AAP hian assembly seat 117 awmah seat 92 an la a, Mann hian Sangur district-a Dhuri assembly constituency-ah amah hnaih bertu, Congress candidate Dalvir Singh Goldy chu vote 58,206 in a hneh.