Kum 12-14 inkarte Covid vaccine pe ṭan ta

Ram pumah nimin aṭang khan kum 12-14 inkarte chu Covid-19 vaccine pek ṭan an ni ta.

Kum 12-14 inkarte hi Hyderabad-a Biological Evans siam, Corbevax pek an ni ang. Corbevax hi India rama Covid-19 vaccine siam pathumna a ni.

Nimin zing khan prime minister Narendra Modi chuan a twitter-ah vaccine la thei chinte chu la vek turin a sawm. Kum 12-14 inkarte hnena vaccine pek chhuah rual hian, a hmaa kum 60 chin natna benvawn nei chauhin precaution dose an lak theih pawh siamṭhain, kum 60 chunglam tupawhin an la thei tawh dawn bawk.

Sorkar laipuiin kaihhruaina a tihchhuahah, kum 12-14 inkarte hnenah hian Corbevax hi dose hnihna, ni 28 inkar danah pek an ni ang. Kum 2021, March 1 thleng khan India ramah naupang kum 12-14 inkar hi vaibelchhe 4.7 an awm a ni.