Health Minister hoin high-level meeting nei

China leh South East Asia ramah Covid-19 hri a len thar leh avangin union minister Mansukh Mandaviya hoin Nilaini khan hma lak dan tur ngaihtuahin high-level meeting neih a ni.

Meeting-ah hian health secretary, pharma secretary leh central sorkara principal scientific adviser bakah health official dangte an tel. Minister Mandaviya chuan official-te chu inralring tura chahin, genome sequencing tam zawka ti tur te leh hri leng dinhmun enfiah ṭha turtein a chah.

India ramah Omicron variant vanga hri leng thawh thumna thleng chuan ziaawm lam a pan mek zel a, nikhata hri kai hmuhchhuah pawh an tlahniam tawh hle. Research ṭhenkhatin June thlaa hri leng thawh lina a thleng leh maithei nia an sawi laiin, expert-te chuan tuna India ram dinhmun thlirin hri leng thawh lina hi a thleng tawh kher lo thei niin an sawi ve leh thung.

Nilaini khan India ramah hri kai hmuh chhuah 2,539 awmin, hri kai hi mi 4,30,01,477 hmuh an ni tawh. Hemi ni hian hripui vanga thi mi 60 awm belh lehin, India rama Covid-19 vanga thi hi 5,16,132 an awm tawh a ni.

Nikhata hri kai hmuh chhuah, daily positivity rate hi 0.35% ah a tlahniam tawh a, weekly positivity rate pawh 0.42% a ni. Hri kai mek, active case hi hri kai tawh aṭangin 0.07% an ni tawh bawk.

Ram pumah Covid-19 vaccine pek hna chu ngawrh taka kalpui chhunzawm zel a ni. Nilaini aṭang khan kum 12-14 inkarte Covid-19 vaccine pek ṭan an ni a, a ni khatnaah hian naupang nuai thum chuangin vaccine hi an la. Union health ministry data-a a lan danin, nimin zing dar 8 thleng khan India ram pumah Covid vaccine hi dose vaibelche 180.80 chuang pek chhuah a ni tawh a ni.

World Health Orga­nisa­tion-in a tarlan danin, kar liam ta khan khawvel pumah Covid-19 hri vanga thi chu 17% in a tlahniam a, mahse hri kai thar erawh an pung leh thung. WHO weekly report chuan kar liam ta chhung khan khawvelah Covid-19 hri kai thar maktaduai 11 chuang an awm a, a kar hmasa aiin hri kai hi 8% in an pung. Hemi hun chhung vek hian hri vanga thi hi mi 43,000 an awm bawk. Kar thum chhung chu khawvel huapin hri vanga thi zat hi an tlahniam tawh a ni.