India democracy-a Facebook a inrawlh hi titawp rawh u : Sonia Gandhi

Congress party interim president, Sonia Gandhi chuan India ram inthlan kaihhnawiha Facebook leh social media lian dangte inrawlhna chu tihtawp turin sorkar laipui a phut.

Lok Sabha-a Zero Hour-ah Sonia Gandhi hian Al Jazeera leh The Reporters' Collective report tihchhuah, political advertisement tihchhuah manah Facebook-in political party dangte aia BJP nasa taka a tihtlawm sak bik chungchang chu a sawichhuak a ni.

Gandhi chuan, 'Sorkar laipui chu Facebook leh social media lian dangte, khawvela democracy ram lian ber inthlan kaihhnawiha an inrawlh ṭhin chu titawp turin ka ngen a ni. Hei hi party politics piah lam thil a ni," a ti. Thuneihna changtu chu tu pawh ni se, democracy humhim leh mipuite boruak ṭha tak hnuaia an awm zel theihna tur siam chu a ngai a ni, tiin a sawi.

Congress hruaitu chuan FB leh social media dangahte thu dik tawk lo thehdarh chuan naupang leh kum upa zawkte rilruah pawh huatna a tuh ṭhin tih sawiin, report tihchhuahah hian company lian te, rorellai leh khawvel huapa social media company lian FB-ten inzawmna an neih dante hi a rawn tilang a ni, a ti.