Union health ministry-in State paliah health expert tir

Union ministry of health and family welfare chuan hri leng hluar zualna zinga state pali - Haryana, Rajasthan, Gujarat leh Manipur-ah Covid-19 dona kawnga pui turin high-level expert team a tir.

Expert team-te hian an kalna state-a Covid-19 dona kawnga state sorkar hmalaknate an pui dawn a ni. Hri darh zel tur venna te, hri len hluar zualna bial enthlithlai te, test neihpui dan te, hri laka inven dan tur leh a dona kawngahte chak zawka hma lak a nih theihna atan an pui dawn a ni. 

State pali-a team tirhluhah hian expert pathum zel an tel a, an kalna state-a Covid-19 kai tam zualna district te an tlawh kual bawk ang.  

Chawhrualin rampumah Covid-19 hri kai mi maktaduai khat zelah mi 6,497 an awm anga chhut a ni. Hetih lai hian Haryana-ah hian mi maktaduai khat zelah mi 7,341, Gujarat-a mi 3,000, Manipur-ah hian mi 7,219 leh Rajasthan-ah mi maktaduai khatah mi 7,341 zelin hri hi an kai anga chhut a ni. 

Haryana health minister Anil Vij chu an state-a Ambala Catonment-a hospital-a coronavirus vaccine enchhin­na neih turah a in volunteer a, nimin khan vaccine trial dose hi pek a ni. 

Bharat Biotech siam, Covaxin chu nimin aṭang khan Haryana-ah phase 3 trial neih ṭan a ni. 

Kum 67 mi, minister hian an state-a Covid vaccine enchhinah neih turah volunteer hmasa ber nih a tum thu a lo sawi tawh a ni. 

Tun kar tir lam khan Bharat Biotech chuan Covaxin phase 3 trial a nei dawn tih a lo puang tawh a ni. Trial hi Indian Council of Medical Research (ICMR) nen thawkdunin an nei dawn a, volunteer 26,000 velah enchhin tum niin, India rama Covid-19 vaccine clinical trial lian ber tur a ni. Drugs Controller General of India pawhin trial neih hi a lo phalsak tawh. 

Covaxin Phase 1 leh Phase 1 clinical trial hi mi 1,000 velah neih a lo ni tawh a ni a, enchhinna neih tawh chinah a ṭha tawka ngaih a ni. 

Brihanmumbai Municipal Corporation (BMC) chuan nimin khan hri lengin ziaawm lam a pan theih loh avangin Mumbai khawpui chhunga school-te chu December 31 thleng khar an ni dawn tih a puang. 

Maharashtra state chhung hmun dangah erawh November 23 aṭangin school hawn theih a ni dawn a, mahse school hawn a nih pawhin sorkarin hri darh tur venna atana kaihhruaina a siamte khauh taka kengkawh tura tih an ni. 

Haryana sorkar pawhin nimin khan state chhunga school, sorkar leh private school zawng zawngte chu November 30 thleng khar turin thupek a tichhuak. 

State health department-in a tarlan danin, school hawn anih hnuah district hrang hrangah zirlai naupang 300 chuangin hri an kai tih hmuhchhuah a ni tawh tih a sawi. Hei vang hian zirlaite leh zirtirtute himna atan sorkar chuan school hi khar leh rih a rawt a, school khar chhung hian school tinte chu damdawi hmanga kah thianghlim vek a ni dawn tih a sawi bawk. 

Delhi sorkar chuan Covid-19 hri kai an pun chak avangin, he hri kai, natna langchhuak, symptomatic-te chu rang zawka hriatchhuah zung zung an nih theihna atan in tina kala enfiah hna, door-to-door survey chu nimin aṭang khan a nei ṭan. 

Door-to-door survey hi containment zone 4,500 huam chhungah leh, containment zone-a puan ni kher lo, mahse hri kai tam zualna hmun/vengah neih a ni bawk ang. He survey hian mi nuai 58 vel a huam thei dawn a ni. 

Khawpui chhunga district 11-a survey nei tur hian Delhi sorkar chuan mi 10,000 dawn a ruat a, anni hian in tinah kalin an temperature leh oxygen saturation (Spo2) an check sak dawn a ni. Enfiahnaa khawsik neite chu an awmna aṭanga hnai ber, government dispensary-ah Covid-19 test neih sak an ni ang.