Bihar minister hlui court-ah inpe

Bihar-a Muzaffarpur shelter home-a hmeichhe naupangte pawngsualna thleng kaihhnawiha man tuma zawn mek, minister hlui Manju Verma-i chu hun eng emaw chen a bibo hnuah nimin khan Begusari court-ah a inpe.

Bihar police-ten Verma-i an dapnaah ralthuamte an hmuh avangin Arms Act hnuaia manna tur thupek an tichhuak a, mahse hemi hnu hian minister hlui hi a awmna chin hriat lohin a bibo zui a ni. Supreme Court chuan Bihar police-te chu Verma-i an man theih loh avang hian a lo khak tawh nghe nghe a ni. November 27 thlenga an la man theih loh chuan Director General of Bihar Police chu court hmaa inlan turin alo ti tawh a ni.

Verma-i pasal, Chandrasekhar Verma chu Muzaffarpur shelter home-a pawngsual thleng chungchanga mawh-phurtu bera puh, Brajesh Thakur nena inzawmna nghet tak neia puh a nih avangin Verma-i hi social welfare minister a nihna aṭangin a bang a ni. Pawngsual thubuai chhuina kal zelah an chenna in hi police-te chuan an dap a, hetah hian silai mu ṭhahnem tham tak hmuh a nih avangin Arms Act hnuaiah an nupa hian thubuai siamsak zui an ni. October 29 khan Verma-i pasal chu court-ah a inpe a, amah chu a bibo zui a ni. Janata Dal United (JDU) chuan Vermna-i chu an party aṭangin an hnawtchhuak tawh bawk.