Delhi sorkarin ruah surtir tum

Delhi sorkar chuan khawpui boruak bawlhhlawh belh zel avangin boruak bawlhhlawh zual lenbo tir turin tunkar chhung hian khawpui chhungah ruah a sur theihna turin 'artificial cloud' siam a tum.

Karthum kalta aṭang khan Delhi air quality hi a chhe hle a, mihring hriselna atana hlauhawm dinhmunah a awm tawh a ni.

Official-te chuan khaw awmdanin a zir chuan tunkar chhung hian ruah sur theihna turin 'artificial cloud' hi siam tum a ni a, mahse a remchan loh chuan karlehah tih a ni ang, an ti.

Artificial cloud hi chemical agent hrang hrang hmanga siam a ni a, chhum awmsa tichhah turin silver iodide, dry ice leh common table salt thlengin hman a ni a, hei hian ruah sur theihna chance a tisang a ni. Khawchin zirtute chuan ruah sur tir theihna hun remchang hi zawngin khaw chinte uluk takin an zirchiang mek a ni.

Kum 2016 khan sorkar chuan boruak bawlhhlawh zual tihfaina tur hian artificial cloud siam theih dan tur a lo ngaihtuah tawh a, mahse an ruahmanna hi a hlawhtling ta lo a ni. Nikum khan state sorkar chuan Union Environment Minister Harsh Vardhan hnenah khawpui chhung khu lutuk tihziawmna turin helicopter hmanga tui phuh a lo rawt tawh bawk.