Chhattisgarh : Inthlan thawh hnihnaah vote 72% tla

Chhattisgarh assembly inthlan thawh hnihna, Thawhlehnia neih taka vote tla chu 72% a tling niin Election Commission chuan a sawi.

Seat 90 awmna, Chhattisgarh assembly inthlan hi thawh hniha neih niin, a thawh khatna chu November 12 khan assembly bial 12-ah neih a lo ni tawh a ni. Inthlan thawh khatnaah hian vote 76% a tla a ni.

Inthlan thawh hnihna leh a tawpna hi bial 72-ah Thawhlehni khan neih a ni a, candidate 1,079 awmin an zingah hian hmeichhia 119 an awm a, vote nei mi 1,54,00,596 an awm.

Vote thlak hun hi zing dar 8 aṭang tlai dar 5 thleng hawn a ni a, mahse polling booth pahnih - Bindranavgarh constituency-a Amamora leh Modh-ah chuan Naxal helho vangin vote thlak hun hi zing dar 7 aṭanga tlai dar 3 chhung hawn a ni thung. Booth ṭhenkhatah vote thlakna, electronic voting machine (EVM) lamah harsatna a awm avangin vote thlak hun pawh tikhawtlai a ni bawk.

Inthlan ni hian Bilaspur district-a Marwahi constituency polling booth-a presiding officer leh polling staff pakhat chuan an laka complaint thehluh a awm avangin chawlh tir an ni. Poll official te chuan complaint thehluh hi chhuichian a nih tur thu a sawi.

Chhattisgarh-a inthlan neihnaah hian venhim hna thawktu nuai 1.50 chuang dah an ni. Inthlan thawh hnihna atan bik hian polling booth 19,336 siam niin, heng zinga 444 chu sensitive booth-ah puan a ni.