Loneituten Mumbai panin kawng an zawh

Maharashtra-a loneitute chuan sorkar laka an thil phut hrang hrang nawrna atan nimin khan Thane aṭangin Mumbai panin kawng an zawh.

Nimina kawngzawhnaah hian loneitu 20,000 chuang zet an tel. An thil phut zingah hian an loan ba ngaihdam te, khawkhengin an thlai a tihchhiat vanga zángnadawmna pek te a tel.

Ni hnih awh tur kawngzawh hi nimin chawhma dar 10 khan Thane aṭangin ṭan a ni a, tlai dar 5-ah Mumbai-a Somaiyya Ground thlengin rally neih zui nghal a ni. Vawiinah Azad Maidan-ah kawngzawh hi chhunzawm a ni ang a, kawngzawh tawpah hian loneitute hian an thil phut tihhlawhtlin phut hian sit-in protest an nei zui ang.

Loneitute kawngzawh hi Lok Sangharsh Morch huaihawt a ni a, water conservation activist Rajendra Singh leh Swaraj India hruaitu Yogendra Yadav-ten an kaihruai a ni.

Kumin March thla khan loneitu 50,000 dawn chuan loan ba ngaihdam leh, Forest Rights Act hman phutin Maharashtra hmarlama Nashik aṭangin Mumbai pan hian kawng an lo zawh tawh bawk a ni.

Morcha general secretary Pratibha Sindhe chuan, " Maha-rashtra-a loneitute chuan harsatna nasa tak an tawk mek a, state sorkarin loneitute dinhmun a ngaihthah bawk si avangin sorkar laka lungawi lohna lantir mai loh chu thlan tur dang kan nei tawh lo a ni", a ti.

Nimina nawrh huaihawtte thil phut zingah hian Forest Rights Act hman te, loan ba ngaihdam te, Nar-Par, Damanganga and Vagh Pinjal river linking projects vanga tribal thingtlang khuaa cheng sawnchhuah tihtawp te, Mumbai-Nagpur expressway leh bullet train tana ram pek tihtawp te a tel. Boruak ṭha tak hnuaiah nawrh hi huaihawt a ni dawn tih sawiin, khawpuia chhunga chengte tana harsatna thlen lo thei anga bera kalpui an tum tih Shinde-i chuan a sawi.

Loneitute nawrh huaihawt hi political party Janata Dal (S) leh Aadm Aadmi Party bakah NGO hrang hrangten an thlawp thu an sawi a ni.