Telangana inthlan neih turah nomination 3,500 chuang lut

Seat 119 awmna, Telangana assembly inthlan neih tura chuh tumin mi 3,500 chuangin nomination paper an thehlut. Telangana assembly inthlan hi December 7 hian neih a ni dawn a, inthlan chuh tumte tana nomination thehluh hun hi Thawhlehni khan a tawp tawh a ni.

Chief Electoral Officer office thuchhuah chuan, nomination thehluh theih hun ni hnuhnung berah 2,087 zet thehlut niin, hengte nena nomination thehluh zawng zawng chu 3,584 a nih thu a sawi. Nomination lutte hi nimin khan enfiah a ni a, inhnukdawk duhte tan vawiin thleng hun hawn a ni.

Assembly bial 119-a inthlan hi thawh khata zawh fel tur niin, December 7-ah vote thlak a ni ang a, December 11-ah vote tla chhiarin result puan nghal a ni ang.

Telangana Assembly hi a term tawp hma thla riatah, September 6 khan ṭhiah a ni lo ni tawh a ni. Rorellai Telangana Rashtra Samithi (TRS) chuan inthlan hma a duh avangin a hun hmain assembly hi a ṭhiat a ni.

TRS hian seat awm zawng zawngah party malin a chuh dawn a, Congress party chuan eptu ṭangrual pawl 'Mahakutami' a ho dawn bawk. Ṭangrual pawlah hian Congress bakah Telugu Desam Party (TDP), Telangana Jana Samithi (TJS) leh Communist Party of India (CPI) te an tel.