Hri leng dona kawngah state-te tha thlah lo turin chah

South East Asia leh Europe-a Covid-19 hri kai an pun chhoh leh avangin, sorkar laipui chuan state sorkarte chu hri leng dona kawnga an tha thlah lo turin a chah.

Eizawnna hna thawh leh social activity-te chhunzawm chungin,state sorkarte chu hri leng dona kawnga hmalakna pawimawh panga - 'test, track, treat, Covid-appropriate behaviour, vaccinate' te chu ngaih pawimawh chhunzawm zel turin a ti a ni.

Union health secretary Rajesh Bhushan chuan state leh union territory zawng zawngte lehkha thawnin, variant thar awmte rang taka hmuhchhuah a nih theihna turin sample test tam zawk nei turin a ti a, mipuite pawh Covid-19 vaccine la tura fuih turin a chah bawk.

Ram ṭhenkhatah hri kai an pun thar leh avangin March 16 khan union haelth minister Mansukh Mandaviya hoin hma lak dan tur ngaihtuahin high-level meeting neih a lo ni tawh bawk. He hunah hian state tinte chu genome sequencing titam tur leh, hri leng chungchangah an state dinhmunte uluk taka thlithlai a, fimkhur turin an chah an ni.

World Health Organisation chuan thla khat chuang zet ram hrang hrangah hri lengin ziaawm lam pan a, hri kai thar an tlakhniam hnuah, kar liam ta aṭang khan hri kai an rawn pung leh ṭan niin a sawi. Hri darh lehna chhan hi inkaichhawn awlsam tam, Omicron variant leh BA.2 subvariant vang leh, ram hrang hrangten hri leng laka invenna tura khuahkhirhna an siamte an thlahdul chhoh tak vangte nia a lan thu a sawi.

WHO chuan kar liam ta chhung khan khawvel huapin hri kai thar hi a kar hmasa aiin 8% in a pung tih a sawi. March 7-13 chhung khan khawvelah Covid-19 hri kai thar maktaduai 11 an awm a, hemi hun chhung vek hian hri vanga thi hi 43,000 an awm bawk. Kumin January thla hnu lamah kar khat chhunga hri kai an pun chhoh lehna hmasa ber a ni. A pun tamna hi Western Pacific region, South Korea leh China ramte awm telna hmun niin, hri kai thar hi 25%-a pungin, thihpui hi 27% in an pung bawk.

Africa-ah hri kai thar hi 12% -a pungin, thihpui hi 14% in a pung bawk a, Europe-ah hri kai 2% in an pung a, mahse thihpui zat erawh an pung lo thung. Eastern Mediterranean region-ah chuan hri kai hi an tlahniam a, mahse hri vanga thi erawh 38% in an pung thung a ni.

Hri kai thar 2,528 an awm
Union health ministry tarlan danin, India ramah Ningani khan hri kai thar 2,528 awm lehin, hri vanga thi 149 an awm bawk. Hemi ni hian hri kai enkawl dam 3,997 an awm bawk a, hri kai dam tawh hi 4,24,58,543 an tling tawh.

Hri kai mek, active case hi 29,181-ah tla thlain, ni 685 hnuah 30,000 hnuaiah a awm ve thei ta a ni. Active case hi hri kai hmuhchhuah tawh aṭangin 0.07% a ni a; hri kai enkawl dam, recovery rate hi 98.73% ah a kai chho tawh bawk.

Ram pumah puitling vaibelchhe 96.7 in Covid vaccine dose khatna an la tawh a, mi vaibelchhe 81.52 ten dose kimin an la tawh bawk a ni.