Punjab CM tharin anti-corruption helpline number a WhatsApp number atan a hmang dawn

Punjab chief minister thar, Bhagwant Mann chuan a kaihhruai sorkarin eirukna dona turin hma a la nghal dawn tih sawiin, anti-corruption helpline number pawh March 23-ah puanchhuah a ni dawn tih a sawi. Hemi rual hian helpline number hi a personal WhatsApp number a ni nghal dawn tih a sawi bawk.

"Thamna pe turin an phut cheu a nih chuan, video/audio recording chu min rawn thawn nghal zel ula, eiruknaa inhnamhnawihte lakah action na takin kan la nghal zel ang," tiin CM thar chuan a sawi.

CM chuan he helpline hi mipuite'n officer eiru, an hnathawhnaa midangte laka thamna beisei leh phut ṭhin te, leh dik lo taka thil tih lai video an upload theihna tur a nih thu sawiin, hetianga manchhuah officer-te chu thubuai siamsak zel an ni ang, a ti. "An zinga 99% hi mi dik leh rinawm an ni a, hetih lai hian a dik lo 1% lekte hian he system hi an tihmingchhia a ni. Officer dik leh rinawmte lamah ka ṭang zel ang," tiin a sawi a, roreltu zinga tumahin officer-te lak aṭangin sum an beisei tur a ni lo, a ti bawk.

Sorkarna siam thei tura thlang tlingtu, mipuite chu an roreltu dik takte an ni tih AAP hruaitu Mann chuan a sawi, mipuite hi roreltute thlang tlingtu leh paihthla theitu an ni, a ti. A kaihhruai sorkarin a tum ber chu London, California leh Paris angte siam ni loin, Punjab state dik tak siam a ni a, a ti.