Kum 2 dawn hnua hri kai thar tlem ber ni thleng

India ramah Inrinni liam ta khan Covid-19 hri kai thar 1,761 awmin, hei hi ni 688 chhunga ni khata hri kai hmuhchhuah an tlem ber ni a ni.

Ram pumah hri kai hmuhchhuah tawh hi 4,30,07,841 awmin, hri kai mek hi 26,240-ah an tla thla tawh a, hei hi hri kai tawh aṭangin 0.06% a ni. Hri kai enkawl dam, recovery rate pawh 98.74% ah a kai chho tawh bawk.

Ni khata hri kai thar, daily positivity rate chu 0.41% niin, weekly positivity rate chu 0.41% a ni.

Mipuite fimkhur chhunzawm zel turin chah
India ramah hri leng ziaawm chhoin hri kai thar pawh nasa takin tlahniam mah se, health expert-te chuan mipuite chu fimkhur chhunzawm zel tura chahin, Omicron sub-variant, 'stealth Omicron' a rawn luh chuan hri leng thawh lina a thleng leh thei tih an sawi.

Tun hnaiah Southeast Asia leh Europe ram ṭhenkhatah hri a darh thar leh a, a bikin China leh South Korea chuan Wuhan-a Covid-19 hri hmuhchhuah a nih hnua hri leng nasa ber an tuar mek a, hri a darh lehna chhan hi 'stealth Omicron' vang nia rin a ni.

Denmark-a Statens Serum Institute (SSI) in a chhut danin, 'stealth Omicron' hi a Omicron variant aiin a let 1.5 in inkaichhawn a awl zawk. A hma ami ang bawkin he variant hian upper respiratory system lamah nghawng a nei a, hritlang natna anga langin rim hriatna leh thil tui hriatna a bo lo a, thawk lamah pawh harsatna vak an nei lo bawk. He variant kaite hi ni hnih aṭanga ni thum hnuah langchhuakin, khawsik, khuh ro, hrawk na, lu na te neiin an taksa a zawi hle bawk.