Assembly inthlan awm tur thlirin BJP-in 'The Kashmir Files' an chawi lar : Shiv Sena MP

Shiv Sena MP Sanjay Raut chuan Gujarat leh Rajasthan-a assembly inthlan lo awm tur thlirin, BJP chuan Kashmir Valley-a Kashmiri Hindu-te tawrhna lantirna, 'The Kashmir Files' chu nasa takin an chawi lar tih a sawi. Hemi rual hian he film-ah hian thudik eng emaw zat nuaibo tumna pawh a awm a ni, a ti.

Shiv Sena chanchinbu, 'Saamana'-a a column, 'Rohkthok' tihah hemi chungchang hi Raut chuan sawiin, BJP chuan Kashmir Valley aṭanga tlanchhia, Kashmiri Pandit-te an awmna lama hruai kir leh chu lo tiam tawh mah se, Article 370 tihbo a nih hnuah pawh an intiamna hi an la tihlawhtling lo tih a sawi bawk.

Raut chuan prime minister Narendra Modi chu 'The Kashmir Files' chawi lartu pui ber a nih thu a sawi bawk a ni.

Kum 1990 chhoa Pakistan thlawp firfiakte'n an beihna avanga Kashmir Valley-a Kashmiri Hindus-te tawrhna leh an tlanchhiat dante chu 'The Kashmir Files' ah hian pholan a ni. March 11 khan tlangzarh niin, tlangzarh a nih aṭang hian political party hrang hrangah inhnialna a siam nasa nghal hle. Hetih lai hian BJP chuan he film hi thlawpin chawilar an tum hle a, party hruaitute pawhin fakna thu an sawichhuak nasa hlawm a, BJP sorkarna state eng emaw zatah chuan he film hi entertainment tax pawh an awltir a ni.

Sanjay Raut chuan, "He film hi Kashmir-a Hindu Pandit-te chungchang, beih leh thah a nih dan te, an tawrhna leh an chunga thil thlengin an rilru thlenga a nghawng dan chungchang a ni. Mahse thil pawi tak chu he film aṭanga Hindu-Muslim te ṭhendarh a, election lo awm tura hnehna channa atan hman tum an awm hi a ni," tiin a sawi. Kashmir Valley-a thil thlengah hian Kashmiri Pandit te chauh ni lo, Kashmiri Sikkh leh Muslim-te pawh thah an ni tel tih a sawi. Mahse thil thleng dik tak tam tak chu 'The Kashmir Files' hian a thup bo thung a ni, a ti.