Punjab sorkarin hna thar 25,000 hawng

Punjab-a Aam Aadmi Party (AAP) sorkar thar chuan sorkar department hrang hrang hnuaiah hna 25,000 a hawng.

Chief minister Bhagwant Mann kaihhruai sorkar hian Inrinni liam ta khan cabinet meeting hmasa ber neiin, hetah hian sorkar hna 25,000 lak belhna tur hi an pawm a ni. CM chuan an party MLA-te chu hna lak turah tumah sawipui leh duhsak bik nei lo turin a chah nghal a ni.

CM Mann chuan, "Mi tam takin hna lak tur chungchangah hian an rawn be dawn che u. Mahse tumah lo sawipui suh su. Aam Aadmi Party-ah eirukna leh hlemhletnain hmun a nei ve lo," a ti.

AAP National Convenor leh Delhi chief minister Arvind Kejriwal pawhin Punjab-a AAP MLA te hmaah video conference kaltlanga thu sawiin, Chief Minister tharin ni thum chhung leka hna tam tak a thawk hman chu a fak. "Punjab sorkar chuan hna a thawk ṭan nghal a ni," tiin a sawi.

Mann hian a hmain a kaihhruai sorkar chuan anti-corrupton helpline number a siam dawn a, hei hi amahin a WhatsApp number-ah a hman nghal tur thu a sawi. He number-ah hian mipuiten officer eirute chu an thil tih dik lo lai video an thawn thei dawn a, sorkarin hma a la nghal zel dawn tih a sawi a ni.

State 4-ah sorkar thar la ding lo
Tun hnaia assembly inthlan neihna state panga - Goa, Manipur, Punjab, Uttar Pradesh leh Uttarakhand zingah Aam Aadmi Party (AAP) chakna, Punjab-ah chiah sorkar thar a la ding a, BJP sorkarna tur state dang paliah sorkar thar din a la ni lo.

Inthlan result puan a nih aṭanga hun eng emaw chen a liam hnuah pawh BJP chakna state paliah hian sorkar thar lakluh an la ni lo a, state ṭhenkhatah chuan chief minister post chungchangah party chhungah inbeihna a awm nia sawi a ni.