Congress puihnain sorkar kan siam dawn : Mehbooba Mufti Governor-in assembly a ṭhiat

Jammu and Kashmir-a Peoples Democratic Party leh National Conference party chuan sorkar thar siam turin Congress party thawhpui an tum. Sorkar an siam theih thu an sawi hnu lawkah Governor Satya Pal Malik chuan assembly a ṭhiat zui ve nghal.

Finance minister hlui leh senior PDP leader Altaf Bukhari chuan ṭangrual pawl siam an tum thu hi sawiin, party pathum - Congress, PDP leh NC chuan state special identity venhimna turin thawhho an remti a ni. Hun reiloteah thawhhona tur hi tihfel a ni ang, a ti.

PDP hruaitu dangte pawhin hei hi sawilangin, ṭangrual sorkar tharah chuan PDP-in chief minister dinhmun hi a chang dawn a, CM atan hian Mehbooba Mufti-i emaw, Mufti-i duhthlan midang emawh dah an ni dawn tih a sawi.

PDP hian MLA 28 neiin, NC-in 15 leh Congress-in 12 an nei. House-a majority nei tur hian MLA 44 chin neih phak a ngai a, party pathumte hi an thawkho a nih chuan hei hi awlsam takin an khum thei dawn a ni.

CM hlui Mufti-i leh NCP hotu Sajal Lone-ten ṭangrual sorkar an siam theih thu an sawi hnuah, Nilaini tlai khan Jammu and Kashmir Governor Satya Pal Malik chuan state assembly a ṭhiat nghal a ni. Kumin June thlaa Mufti-i kaihhruai PDP-BJP ṭangrual sorkar aṭanga BJP a inhnuhdawh hnuah Jammu and Kashmir hi Governor's Rule hnuaiah a awm a ni.

Governor chuan J&K tana ṭha zawk tur a nih avanga assembly chu ṭhiah a nih thu a sawi a, inthlan buatsaih a, mipui thlan sorkar ngei din a duh tih a sawi. A thiltih chu Jammu and Kashmir constitution duhdan anga tih a ni tih a sawi bawk.