Cyclone Gaja: TN-in ṭanpuina Rs vbch 15,000 dil

Tamil Nadu Chief Minister Edappadi K Palaniswami chuan an state-a thlipui, cylcone Gaja tlehin chhiatna a thlente siamṭhat leh thlipui tleh tuarte chhawmdawlna atana ṭanpuina, cheng vaibelchhe 15,000 pe turin sorkar laipui hnenah a dil.

CM Palaniswami hian nimina Prime Minister Narendra Modi hnena an inhmuhnaah ṭanpuina hi pe turin a ngen a ni.

Kar kalta Zirtawpnia cylcone tleh hian Tamil Nadu-a district 12-ah chhiatna nasa tak thlenin, mi 63 in nunna an chan a, mi za tel chu chenna in nei loin an awm phah bawk.

Palaniswami chuan PM hnenah thlipui tlehin chhiatna a thlen dante enfiah tura central team tir turin a ngen. Meeting an neih zawh hnua chanchin thar lakhawmtute a kawmnaah, PM hnenah hian chhiatna thleng hrang hrang tarlangin, memorandum a thehluh thu a sawi. Thlipui tlehin thil a tihchhiat siamṭhat hna lo thawh hmasakna atan cheng vaibelchhe 1500 chu a rang thei ang bera pe tura a ngen bawk thu a sawi. Central team hian karleh hian Tamil Nadu hi an tlawh ang.

State sorkar chuan chhiatna thlenga chhawmdawl hna thawhna turin cheng vaibelchhe 1,000 a pekchhuah tawh thu a sawi a, mahse hei hi a tawk lo hle a, sorkar laipui aṭangin ṭanpuina tam zawk an la mamawh tih a sawi.

Thlipui tleh hi Thanjavur, Tiruvarur, Nagapattinam leh Pudukottai district-ten an tuar nasa zual a, chenna in tam tak a chhiat bakah, thlai chin tam tak a chhe bawk a, hei vang hian loneituten harsatna lian tak an tawk a ni. Hmun tam takah power supply a chhe bawk. Tamil Nadu sorkarin a chhut danin thlipui tleh hian electric ban 86,702 bakah distribution transformer 841 leh electric sub station 201 a tibuai a ni.