Maharashtra loneituten Mumbai chhuahsan duh lo

Maharashtra loneitu, Mumbai-a nawrh huaihawt te chuan an thil phut tihhlawhtlin a nih hma chu Mumbai an chhuahsan dawn lo tih an sawi.

Nimin khan Maharashtra Legislative Assembly kawtah loneitu leh tribal mi sang chuang an pungkhawm a, an thil phut chungchangah Chief Minister Devendra Fadnavis hmuh an tum a ni. Sorkarin an thil phutte a tihhlawhtlinsak hma chu Mumbai chhuahsan an tum lo tih an sawi a ni.

Lok Sangharsh Morcha kaihhruaina hnuaiah loneitu 7000 chuang te chuan Nilaini zing aṭang khan Mulund Octroi Naka aṭangin kawng an zawh a, political party ṭhenkhat Janata Dal (Secular), Aam Aadmi Party (AAP) leh Shiv Sena-te chuan kawngzawh te hi an thlawp thu an sawi. Dr Rajendra Singh leh MP Raju Shetty-te pawhin kawngzawhte hi an thlawp.

An thil phut zingah hian Swaminathan Committee Report kalpui te, Forest Rights Act (FRA) hnuaia claims ngaihtuah loh te leh judicial system dinthar te chu a tel a ni.