Child Care Institute 539 kharsak tawh

Sorkar laipui chuan kumin August thlaa Bihar-a shelter home-a hmeichhe naupangte pawngsual an nih hnuah ramchhung hmun hrang hrangah child care institutes (CCIs) 539 a kharsak tawh niin Women and Child Development Ministry (WCD) chuan a sawi.

WCD official chuan, institute an kharte hi naupangte enkawlna tlaka an ngaih loh thu a sawi a, register lohte an nih bakah dan an bawhchhiat avangin kharsak an ni tih a sawi. Heng institute an khara naupang awmte chu institute dangah sawn an nih thu a sawi.

Naupang enkawlna hmun kharsakte hi Maharashtra-ah 377 niin state leh union territory zingah kharsak tamna ber a ni a, a dawtah Andhra Pradesh niin 78 kharsak an ni a, Telangana-ah 32 khar a ni bawk.

May thla khan Bihar-a Muzaffarpur-a shelter home-ah hmeichhe naupang eng emaw zat pawngsual an ni tih sawichhuah a nih hnuin, August thla khan Uttar Pradesh-a Deoria-ah naupang enkawlte hmunah pawikhawihna a thlen thu sawilan leh a ni bawk a ni.

WCD Ministry chuan National Commission for Protection of Child Rights (NCPCR) hnenah CCI social audit nei tura hrilhin, institute register loh te chu thla hnih chhung ngeia register tir turin a hriattir a ni.

Union WCD Minister Maneka Gandhi chuan state leh district level tina Child Welfare Committees (CWCs) din turin a lo ngen tawh bawk. Minister chuan district magistrate leh district collector-te chu district level-a adoption programme enfiahna kawnga mawhphur tura a duh thu a sawi bawk.