J&K assembly ṭhiahah BJP a inrawlh lo : Rajnath Singh, Governor Rule hmangin BJP in ro rel : Congress

Union Home Minister Rajnath Singh chuan Jammu and Kashmir governor Satya Pal Malik-an Nilaini zana state assembly a ṭhiah chungchangah BJP chuan inrawlhna a nei lo tih a sawi.

Rajnath Singh chuan Governor hian state chhung politics dinhmunte a thlir hnuah, sorkar theihna kawng a awm lo nia ngaiin assembly ṭhiat tur hian thutlukna a siam ta zawk a ni tiin Singh chuan a sawi. Hemi chungchang hi governor thu liau liau a ni a, BJP in inhnamhnawihna a nei lo a, party ṭhenkhatin he thila BJP hnuhluh an tum chu thil pawi tak a ni, a ti.

Peoples Democratic Party (PDP) chief Mehbooba Mufti leh People’s Conference leader Sajjad Lone-ten ṭangrual sorkar an siam thei tih an sawi ve ve hnuah Nilaini zan khan Governor chuan assembly hi a ṭhiat a ni. Mufti-i chuan National Conference (NC) leh Congress party thlawpnain ṭangrual sorkar an siam thei a, thlawptu MLA 56 an nei tih a sawi. Hetihlai hian Lone pawhin BJP MLA 25 leh member dang 18 ten an thlawp dawn niin a sawi bawk bawk. J&K assembly-ah hian seat 87 a awm a ni.

Congress party chuan assembly ṭhiah a nih tak avangin state inthlan chu a rang thei anga buatsaih an phut thu an sawi. J&K-a Governor rule puan chu Modi-a rorelna hnuaia dahna a ni tiin, Governor rule hnuaiah BJP chuan ro an rel a ni, a ti.

Congress party chief spokes-person Randeep Singh Surjewala chuan J&K-a democracy tundin leh theihna awmchhun chu inthlan buatsaih ṭhat chauh a ni tiin, Modi leh Governor te chuan a rang thei ang berin inthlan hi an buatsaih tir tur a ni, tiin a sawi.

Jammu and Kashmir-ah hian PDP leh BJP ten Mufti-i chief minister-na hnuaiah ṭangrual sorkar an din a, mahse BJP-ten ṭangrual sorkar an thlawpna an hnuhdawh hnuah June thla khan Governor Rule hnuaiah dah a ni zui a ni.