Vantlang hmun tibawlhhlawhte sum chawitir dawn

West Bengal Assembly chuan vatnlang hmun tibawlhhlawhtute cheng nuai khat thleng chawitir theihna tur bill chu Ningani khan a pass.

Vantlang hmun tibawlh-hlawhtute hrem theihna tur hian Kolkata Municipal Corporation (second amend-ment) Act section 338 siamṭhat a ni.

Chief Minister Mamata Banerjee chu Dakshineswar skywalk hawn thar-a kuhva eina tui chhakna hnuhma te a hmuhin a lungawi lo hle a, hei vang hian hmun pawimawh tihbawlhhlawh tute hremna tur bill hi rawt chhoh a ni nghal a ni. He bill pass tak hmang hian hmun tibawlhhlawhtute chu a tlem berah Rs 5,000 leh a tam berah Rs nuai khat thleng chawitir theih an ni ang.

Dan siamṭhat a nih hma hian hremna hi a tlem berah Rs 50 leh a tam berah Rs 5,000 a ni ṭhin.

Chief Minister Banerjee chuan vantlang hmun pawimawha chil chhakna hnuhma leh bawlhhlawh dang awmte enfiahtu turin member 11 awmna committee a din tawh bawk.