Maha loneituten nawrh titawp

Maharashtra state sorkarin an thil phut hrang hrangte tihhlawhtling a tiam hnuah loneitute chuan Ningani an khan an nawrh an titawp ta.

Tribal mi loneitute thil phut zingah hian thlai tharte man sang zawka hralh theihna tur siamsak te, khawkheng tuartu lonei-tute zangnadawmna pek te, agricultural loan ba ngaihdam te, tribal te hnena land rights pekte a tel. Mumbai khawpuia an thil phut tihlhlawhtlin phuta ni hnih chhung nawrh an huaihawt hnuah sorkar nen an inbe rem thei ta a ni.

Loneitute hian an thil phut nawrna atan hian Thane district aṭangin South Mumbai-a Azad Maidan thlengin kawng an zawh a, Mumbai an thlen hnuah sit-in protest an nei zui leh nghal a ni. Ningani khan loneitu aiawh mi 20-te chuan Chief Minister Devendra Fadnavis hmuin, an thil putte an sawipui a, darkar hnih chuang zet meeting an nei a ni. Meeting-ah hian CM bakah tribal welfare, revenue leh forest department-a principal secretary te pawh an tel.

Chief Minister Fadna-vis chuan tribal te hnena land rights pekna tur chu thla thum chhunga tihfel sak a tiam a, hma lak dan chu Chief Secretary kaihhruai committee chu ngun takin a enfiah reng dawn a ni, a ti. CM hian loneitute thil phut dangte pawh tihhlawhtlin sak vek a tiam bawk a ni.