Goa CM-in ban a duh, BJP thuneitu lamin remti lo

Hun rei tak a dam lohnain a tlakbuak, Goa Chief Minister Manohar Parrikar chuan CM a nihna aṭanga ban a duh a, mahse BJP high command lamin an remti lo niin Goa Forward Party hotu leh Agriculture Minister Vijai Sardesai chuan a sawi.

Sardesai chuan, "Mano-har Parrikar hian CM hna hi chawlhsan mai a duh tawh a ni. Ganesh Chaturthi festival laia damdawi-ina dah a nih lai pawh khan a portfolio chu midang hnenah pek mai a duh tih pawh a lo tilang tawh a ni", a ti. Mahse BJP high command lam inrawlhin, a ban leh ban loh chungchang chu a kutah innghat vek a nih loh thu an rawn sawi a ni, a ti.

Kum 62 mi, Parrikar hi October 14-a Delhi-a All India Institute of Medical Sciences aṭanga chhuahtir a nih hnuah khan Goa-a a mimal inah a la awm a, hna pawh a la thawk mumal thei lo a ni. Hei vang hian eptu party-te chuan full time-a thawk thei CM an duh thu sawiin, Parrikar hi bang turin an phut fo a ni.