Indian NGO hnena Hewlett Foundation-in donation a pek khapsak

American philanthropic institution, Hewlett Foundation-in Indian NGO hnena ṭanpuina sum a pek ṭhin chu khapsak a ni.

Ministry of Home Affairs chuan Hewlett Foundation aṭanga fund dawngtute hian dan an bawhchhia nia sawi a nih avangin, sorkarin phalna a pek hmasak loh chuan ṭanpuina sum a pek ṭhin hi khapsak a ni tih a sawi.

US-based donor hian kum 2020 khan khawvel ram hrang hranga organisation-te hnenah ṭanpuina, USD maktaduai 465 zet a pe chhuak a, fund dawngtu zingah hian Indian NGO-te pawh an tel a ni.

Hewlett Foundation hian education, environment, gender equity leh governance lama thawk NGO-te hnenah hian fund hi a pe ṭhin a ni, mahse an ṭanpuina dawngtu Indian NGO-te chuan an sum dawn hi Foreign Contribution Regulation Act, 2010 (FCRA)-in a huam loh leh phal loh chinahte an hmang ṭhin niin official-te chuan an sawi a, mahse an hmanna erawh a tarlang tel lo thung. 

Hei vang hian Home Ministry chuan American donor hi FCRA hnuaiah 'Prior Reference Catergory' (PCR)-ah a dah ta a ni. MHA watch list-a dah a nih avang hian sorkarin a pawmpui phawt loh chuan India ram NGO-te tan eng ṭanpuina sum mah a pe thei tawh dawn lo a ni. Bank-te pawhin he foundation aṭanga India rama sum transfer a awm a nih chuan MHA an hrilh hriat vat a ngai a ni.

NGO-te hian ram pawn aṭanga ṭanpuina sum an dawn theihna turin FCRA-ah registration an tih vek a ngai a kum 2021 December thla thleng khan India ramah FCRA-registered organisation hi 22,762 a awm.