Political party-te hi mipui ṭhendarhtu an ni - Ghulam Nabi Azad

Congress party hruaitu hlun, Ghulam Nabi Azad chuan politics chawlhsan a tum thu sawiin, political party-te chu mipuite ṭhendarhtu an ni chu pawi a tih thu a sawi a, heng zingah Congress party ngei pawh a bang lo tih a sawi.

Ghulam Nabi Azad hi Congress hruaitu lu G-24 zingah a tel a ni.

Pathiannia Jammu-a hun a hmanah Azad chuan, "Political party-te hian sakhua, hnam leh thil dang hmangin mipuite ṭhendarh tumin 24x7 an thawk a ni," a ti a, "Kan party pawh ni se, regional party leh national party pawh ni se ka ngaidam thei lo a ni. Mipuite hi kan ṭanrual a, khawtlanga thil ṭha lo awmte hi kan beih let a ngai a ni," a ti.

Azad chuan khawtlanga thil ṭha thleng ṭhin chungchang politician-te chu a dem thu sawiin, "India ram politics hi a tenawm tawh lutuk a, a chang chuan mihring kan ni em tih pawh a rinhlelhawm rum rum hial ṭhin," tiin a sawi.

Tun hnaia sawi hlawh tak, 'The Kashmir Files' chungchang a sawinaah he thu hi Azad chuan a sawichhuak a ni. Kum 1990 chhoa Kashmiri Hindu, Kashmiri Pandit-te tawrhna behchhana film siam hian political party-te inkarah pawh inhnialna a siam chho nasa hle a ni. BJP lam chuan he film hi nasa takin chawilarin, an sorkarna state hrang hrangahte mipui tam zawkin an en theihna turin entertainment tax pawh an awltir hial. Hetih lai hian party dang chuan Kashmir Valley-a Pakistan thlawp firfiakte avanga tawrhna thlengah hian Hindu-te chauh ni lo, Muslim leh midangte pawhin an tuar vek thu an sawi thung.