Political party pahnih, LJD leh RJD inchhunfin

Union minister hlui Sharad Yadav kaihhruai Loktantrik Janata Dal (LJD) leh Lalu Prasad Yadav kaihhruai Rashtriya Janata Dal (RJD) party-te chu Pathianni khan an inchhunfin.

Party pahnihte inchhunfin thu hi puangin, Sharad Yadav chuan hei hi united Opposition siamna tura hma lak ṭanna a ni, a ti.

Sharad Yadav chuan, "RJD nena kan inchhunfin hi eptu pawl inlungrualna siamna tura bul ṭanna a ni. Ram chhunga hmun hrang hranga eptu pawlte hi BJP hneh an nih ngei theihna tura kan inlungrual a ngai. Inpumkhatna ṭha siam hi kan ngai pawimawh hmasa ang a, a hnuah eptu ṭangrual pawl hruaitute tur chu kan la ngaihtuah chauh tur a ni," tiin a sawi.

Kum 2018 khan Sharad Yadav hian Janata Dal (United) leh BJP-te an thawhdun avanga lungawi loin, JD(U) chhuahsanin LJD hi a din a ni. Yadav hi prime minister hlui, Atal Bihari Vajpayee kaihhruai NDA sorkarah cabinet minister a lo ni tawh a ni.