Israel PM Naftali Bennett a rawn zin dawn

Israel prime minister Naftali Bennett chuan India prime minister Narendra Modi sawmna chhangin, April 2 hian ni thum cham turin a rawn zin dawn.

Israel PM foreign media adviser chuan PM Naftali zin tur thu hi sawiin, kum 30 zet ram pahnihten palai intirtawna inṭhianṭhatna ṭha tak an lo nei tawh tihnghehna tur te, thawhdunna ṭha leh zau zawk an neih theihna turte a nih tur thu a sawi. Ram hruaitute hian kawng hrang hrang - innovation, economy, research and development bakah agriculture lama thawhdunna tihchak dan turte an sawidun dawn a ni, a ti.

Naftali Bennett hian a hmain India leh Israel chuan inlaichinna thuk leh nghet tak an nei tih a lo sawi tawh a, kum 2017, July thlaa PM Modi-a'n Israel ram a tlawh ṭum khan ram pahnihte hian thawhdunna zau zawk an lo siam tawh bawk a ni. Modi hi India Prime Minister zinga Israel ram tlawh hmasa ber a ni.