PM Modi-an Mann Ki Baat hmang

Prime Minister Narendra Modi chuan thla tina radio programme a hman ṭhin, 'Maan Ki Baat' vawi 50-na chu nimin khan a hmang leh a, Mann Ki Baat programme siam a nih chhoh dante a sawilang.

Mann Ki Baat programme hi kum 2014 October thla aṭanga neih ṭan a ni.

Nimina thu a sawiah, PM Modi chuan Mann Ki Baat kalpui ṭan a nih aṭangin politics inrawlh tir loh chu a tum ber a ni thu a sawi. Sorkar fakna emaw, a ma mimal fakna emaw tihchhuah a tum lo tih a sawi a, he a thutiam tihhlawhtlinna theihna turin mipuite hnen aṭangin chakna a dawn thu a sawi.

Mann Ki Baat programme tichhuaktute chungah lawmthu a sawi a, politician te chu media-ten an chungchang an chhuah ṭha tawk loin an lungawi lo vek a, mahse he programme chungchang bik erawh chu media lam chuan anmahni duh thu ngeiin an tichhuak ṭha hle a ni, a ti.

Awmze nei takin media-te chuan faina, himna, ruihhlo laka India ram fihlimna tur leh hmeichhiat himna turin hma an la a, TV channel-ah pawh Mann Ki Baat chu radio programme en hlawh ber a ni chho a ni, a ti.

PM chuan tunlai ṭhalaite chu an tum a sangin, thil ropui tak tak an ngaihtuah a, hetianga suangtuahna sang tak neih leh hlawhtlinna ropui tak neih hi India ram thar a ni, a ti. Ṭhalaite chuan ṭum khatah thil tam tak tih an duh ṭhin tia sawiselna a awm ṭhin, mahse hei hi dik lohna a awm em ni? Tum khata hna tam tak thawk turin an ṭha tawk a, chu chu an ti mai a ni, a ti.

Kartarpur Corridor hawn chungchangah sorkar laipui chuan thil ṭha tak a ti a ni tiin, mipuite chuan awlsam takin Pakistan-a Guru Nanak Dev hmun thianghlim tlawh turin Kartarpur an kal theih phah a ni tiin PM chuan a sawi.

Kum 2014-a Prime Minister dinhmun a chelh hnu reiloteah PM Modi hian Maan Ki Baat hi a kalpui a, episode hmasa ber chu hemi kum October thla hian tihchhuah a ni. Episode hmasa berah hian PM chuan Khadi product hmang tura fuihna tur a sawi a, hei vang hian he product hralhchhuahna hi 100% chuang zetin a pun phah a ni.