Sorkarin fuel leh cooking gas man a tisang ; Eptu member-te lungawi loin House aṭangin an chhuak
Eptu party member-te chu tun hnaia fuel leh cooking gas man tihsan a nih avanga lungawi lohna lantir leh, a man tihsanna hi sut leh tura sorkar phutin nimina Lok Sabha rorel inkhawmna aṭangin an chhuak tau.
Parliament Lower House aṭanga chhuak taute hi - Congress, Trinamool Congress, DMK, NCP leh Left party member-te an ni a, House aṭanga an chhuah hma hian fuel leh cooking gas man tihsan an duh lohna thute an aupui bawk.
Eptu member-te hian Lok Sabha-a Question Hour hman veleh hemi chunghcang hi sawichhuah nghal an tum a, mahse Speaker Om Birla chuan phalsak loin, Question Hour-ah sawi zawk turin a tih avangin Question Hour zawh hnuah an sawichhuak ta a ni.
State panga - Uttar Pradesh, Uttarakhand, Punjab, Goa leh Manipur assembly inthlan result puan a nih hnuah sorkarin fuel man hi a tisang dawn nia rinna leh sawi thawm pawh a hmain a awm nasa hman hle. Inthlan neih lai hi international market-a crude oil man a san chhoh lai a ni chungin sorkar laipui chuan fuel man hi a tidanglam chuang lo. Mahse rin lawk angin inthlan result puan fel a nih hnuah, thla li hnua a ṭum khatna atan nimin khan fuel man hi a tisang ta a ni.
Sorkar chuan diesel leh petrol chu litre khatah pawisa 80 in a tisang a, hei hi nikum November hnu a tihsan lehna hmasa ber a ni. Cooking gas, LPG man chu bur khat Rs 50-in a tisang bawk a, hei hi nikum October thla hnua a tihsan lehna hmasa ber a ni bawk.
Congress member Adhir Ranjan Chowdhury chuan Question Hour zawhah fuel man tihsan chungchang hi a sawichhuak nghal a, eptu party-ten state panga assembly inthlan zawhfelah diesel leh petrol man chu sorkarin a tisang dawn tih pawh an lo sawi lawk tawh a ni, a ti.
"Thil man tihsan chungchang leh inthlan chuan inkaihhnawihna a nei lo tiin dawt hmangin an ṭang a, hei hi thil ṭha lo tak a ni. Vote thlak hmaa mipuite an lungawi loh kha an hlau a ni. Fuel-a central tax hi 50% chuang a ni tih an theihnghilh lo ula, mahse a man hi a tihniam duh chuang lo a ni," tiin Congress senior leader Shashi Tharoor chuan NDTV-in an kawmnaah a sawi. Inthlan neihna tur hnaivai a awm mai loh avangin tuna fuel man tihsan hian BJP chuan tawrhna tur a nei dawn rih lo tih a sawi bawk.
Kum 2017, June thla aṭang khan nitin fuel man hi ennawn ṭhin a nih laiin, nikum November thla aṭang hian metro city-ahte a man hi tihdanglam a ni lo. Fuel man ennawn loh leh tihdanglam loh rei ber a thlen hnuah, Thawhlehni khan tihsan a ni ta a ni.Indian hian a oil mamawh zinga 85% hi ram dang aṭanga a lakluh niin, khawvela oil lalut leh hmangtu tam ram pathumna a ni.
RS inkhawm tihtawp a ni
Rajya Sabha-ah fuel man tihsan a nih chungchang sawiho tura Congress hruaitu Shaktisinh Gohil ngenna chu hnawl a nih avangin member-te in aubuaiin rorel inkhawm tihtawp a nih phah bawk.
Rajya Sabha chairman M Venkaiah Naidu chuan Congress MP ngenna hi Rule 267 hnuaiah pawm a nih loh tih sawiin, a kaihhnawih ministry demand for grants sawi hunah sawiho theih a ni ang, a ti. Mahse eptu member lam an aubuai chhunzawm avangin Naidu hian rorel inkhawm hi a titawp a ni.