March 31-ah Covid-19 khuahkhirhnate tihtawp a ni tawh ang : Sorkar laipui

Union Home Ministry chuan ram chhunga Covid-19 hri lengin ziaawm lam a pan zel avangin Covid khuahkhirhna siamte chu March 31-ah tihtawp an ni tawh dawn tih a sawi. Hemi rual hian face mask vuah leh social distancing norms erawh chu hman chhunzawm zel a la ni dawn tih a sawi nghal bawk.

Sorkar laipui hian Covid-19 hri leng vangin kum 2020, March 24 khan Disaster Management Act, (DM Act) 2005 hnuaiah a hmasa ber atan Covid khuahkhirhna dante hi a tichhuak a, hri leng dinhmun azirin heng dante hi siam danglam chhoh zel a ni.

Union home secretary Ajay Bhalla chuan thla 24 liam ta chhung khan hri darh tur venna leh hri kai enkawlna turin hmalakna hrang hrang kalpui a nih thu a sawi. COVID-appropriate behavior chu mipui nawlpui pawhin an hriatchian belh zel tih a sawi bawk.

State leh Union Territory-te chuan an bial chhunga hri darh tur thununna turin ruahmannate an siam hlawm a, an hmalakna avangin kar sarih liam ta chhung khan hri kai thar hi nasa takin an tlahniam a ni, tiin Bhalla chuan a sawi.

Nimin zing dar 8 thleng khan ram pumah hri kai mek, active case hi 23,087-ah a tla thla tawh a; nikhat hri kai hmuh chhuah, daily positivity rate pawh 0.28% a ni tawh bawk. State hrang hrangte thawhhona avangin Covid vaccine pawh dose vaibelchhe 181.89 semchhuah a ni tawh bawk a ni.

Bhalla chuan ram chhung dinhmun te, sorkar inbuatsaihna dante uluk taka ngaihtuah a nih hnuin National Disaster Management Authority chuan khuahkhirhna dan hman chhunzawm zel hi a ngai tawh loin a hria a ni, a ti. Khuahkhirhna dan hman mekte a tawp hun, March 31 hnuah chuan Minitry of Home Affairs chuan thupek dang a tichhuak tawh dawn lo tih a sawi.

Hemi rual hian hri awmdante hi ngaihtuahin, mipuite chuan an fimkhur a, an inven chhunzawm zel erawh a la ṭul thu Home Secretary chuan a sawi. Hri kai punna a awm leh a nih chuan, state leh UT-te chuan local level-in hri darh tur venna atana hma lak dan an ngaihtuah ang a, Ministry of Health lamin thurawn an pe reng dawn bawk a ni, a ti.