Uttarakhand CM atan Pushkar Dhami lalut

Pushkar Singh Dhami chu nimin khan Uttarakhand Chief Minister atan rinawmna thu tiamtira lakluh a ni a, CM term hi a zawnin a chelh dawn ta a ni.

Chief Minister lakluh inkhawm hi Dehradun-a Parade Ground-ah buatsaih a ni a, prime minister Narendra Modi leh union home minister Amit Shah bakah, union minister Nitin Gadkari, BJP national president JP Nadda, Uttar Pradesh Chief Minister Yogi Adityanath, Haryana CM Manohar Lal Khattar, Himachal Pradesh CM Jairam Thakur-ten an telpui.

Uttarakhand assembly inthlanah khan BJP hian seat 70 awmah seat 47 lain, party malin sorkarna a siam thei a ni. Inthlanah an chelh ṭhat viau laiin, CM Dhami hian kum 2012 aṭanga a lo tlin tawhna, Khatima bialah Congress candidate Bhuwan Chandra Kapri chu a hneh zo lo a ni. Mahse a bialah chak zo lo mah se, Thawhṭanni khan BJP legislature party leader atan thlan a ni a, Chief Minister-ah a awm zui leh ta a ni. 

BJP hi Uttarakhand state-ah kum 21 chhunga a zawna term hnih sorkarna siam thei party awmchhun a la ni.

Chief Minister lakluh hnuah a cabinet minister tur mi pariat lakluh ve nghal an ni a, an zingah hian a ṭum khatna atan cabinet minister ni tur mi pathum an tel.