J&K-ah mipuite tlawh theih turin Tulip Garden hawng

Jammu and Kashmir-ah nimin khan Asia-a tulip garden lian ber chu mipuite tlawh theih tura hawn a ni. He pangpar huanah hian tulip maktaduai khat chuang phun a ni.

Tulip Garden hi Kashmir-a khualzinte tlawh nasat zinga mi niin, nipui thlen hmaa Tulip Festival neih ṭhin hi khawvel ram hrang hrang aṭangin khualzin eng emaw zatin an chhim ṭhin. Festival chhimtu an tam ṭhin avangin tualchhung mite pawh eizawnna tam tak a siam phah bawk a ni.

Zabarwan Range bulṭhuta awm, Tulip Garden-ah hian tulip bakah pangpar chi dang, hyacinth, daffodil leh ranunculus te pawh an ching tel ṭhin.