26/11 pawikhawihna thlentu man thei hnenah dollar mtd 5 phal

United States Secretaryof State Mike Pompeo chuan kum 2008, November 26-a Mumbai khawpui beihnaa mawhphurtu firfiakte chungah action la turin Pakistan chu a nawr leh a, heng firfiakte man an nih theihna atana pui thei hnenah lawmman UD dollar maktaduai nga pek a tiam bawk.

26/11-a Pakistan firfiakten Mumbai an beih ṭum hian mi 166 an thi a, midang tam takin hliam an tuar bawk.

Mike Pompeo chuan firfiakte pawikhawihna rapthlak tak a thlen aṭanga kum sawm a tlin thleng pawhin he thila inhnamhnawihte chu thiam loh chantir an la ni lo a, hei hi pawikhawihna thleng tuartu chhungte tan chuan inzah lohna lian tak a ni, a ti. Hei vang hian ram hrang hrang, a bikin Pakistan ram chu UN Security Council-in pawikhawihtu firfiakte hrekna leh hremna pe ngei tura a lo phut tawhna ang chu a taka lekkawh turin a phut tih a sawi.

Misualte thiltih tuartu chhungte leh ṭhiante an tuarpui takzet tih a sawi a, he pawikhawihna thlengah hian America mi paruk pawhin nunna an chan tel a ni, a ti.

Mumbai beitu LeT firfiak zinga pakua chu police-ten an kaphlum a, an zinga nungdama man awmchhun Ajmal Kasab chu thiam loh chantir a nih hnuah thi tura hremna pek a ni tawh bawk.

US chuan he pawikhawihna thlenga inhnamhnawihte chu hremna pek ngei a phut tih a sawi. Kum 2012 April thla khan Department of State chuan pawikhawihna thlenna tura ruahmantu bera puh, LeT founder Hafiz Mohammad Saeed leh Hafiz Abdul Rahman Makki te hrem an nih ngei theihna tura chanchin hrilh thei hnenah lawmman pek a lo tiam tawh bawk a ni. Kum 2001 December thla khan Department of State hian LeT chu Foreign Terrorist Organisation-ah a lo puang tawh bawk.

President Ram Nath Kovind leh Prime Minister Narendra Modi te pawhin nimin khan 26/11-a firfiakte pawikhawihna thlen tuartu chhungte an tuarpui thu an sawi. President Kovind chuan, "Mumbai beih anih aṭanga kum sawm a nih hnuah pawh he pawikhawihna rapthlak thleng tuartute leh an chhungte chu kan hrereng a ni. Hemi nia firfiakte huaisen taka beilettu police leh security force-te zahna kan hlan bawk. India ram chu rorelna dik awmna, firfiaka chetna dolettu a ni zel dawn a ni", ati.

Prime Minister Narendra Modi pawhin a twitter-ah 26/11-a pawikhawihna thlenga nunna chante hriatreng an nih thu leh, an chhungte an tuarpui thu a sawi. Police leh security force huaisen tak takte chu ramin zahna a hlan a ni, tiin a sawi.