JNU zirlai pawl hruaitu hluiin PM Modi bei

Jawaharlal Nehru University Students Union president hlui, Kanhaiya Kumar chuan Prime Minister Narendra Modi chu beiin, amah hringtu nu ngei pawh enkawl zo loah a puh.

Pathianni-a Mumbai-a 'Save Constitution March' neihah, Kanhaiya Kumar chuan PM Modi-an Congress party member ṭhenkhat nu chu hmusit takin an bei nia sawia thinrim taka a chhanlet chungchang chu sawichhuakin, PM nu ni loin, Modi-a zawk hi beih a ni tih a sawi.

"Prime Minister chuan a nu chungchang zah lo takin an sawi niin a sawi a, mahse a nu chungchang pakhatmah ka sawi lo a, a nu a enkawl ṭhat tawk loh avangin mahni nu pawh enkawl zo lo fapa niin ka sawi zawk a ni" tiin Kumar chuan a sawi.

Tun hnaia Delhi-a inkhawm buatsaihah JNUSU presient hlui hian fapa laktlak loh chauhin a nu, kum 90 mi chu bank-ah pawisa thleng turin hun rei tak a din tir ang tiin a sawichhuak a, hei hi pawisa note lian tihthih ṭuma PM Modi-a nuin bank-a pawisa thleng tura a intlar chungchang a sawilanna a ni.

Kumar chuan PM Modi chu 'lemchan thiam tak' tiin a sawi bawk. 'Bollywood-ah lut ve ni se chuan best actor award pawh a dawng ngei ang", a ti.

PM Modi chuan eptu party ten a nu leh pa an beih chungchang chu Congress president Rahul Gandhi tihtir niin a sawi a, a pa kum 30 liamtaa thi tawh hming te an rawn sawichhuak leh a ni, a ti. Party president remtihna telloin Congress member tumahin amah leh a chhungte beihna chungchang chu an sawi a rin loh thu a sawi a ni.