UP, Punjab leh Himachal-ah high level team tir

Sorkar laipui chuan Uttar Pradesh, Punjab leh Himachal Pradesh-a state sorkar ten Covid-19 hri an dona kawnga pui turin high level team-te chu a tir lut tih union health ministry chuan nimin khan a tarlang.

Heng state-te hi Covid-19 hri hluarna state an ni a, he hri vanga damdawi-ina enkawl leh mahni in lama medical supervision kaihhruainaa enkawl an pun chhoh avangin state sorkar hmalak dan tur enpui leh pui turin sorkar laipui chuan team-te hi a tirlut a ni. 

Hemi hma hian hri kai pun chak zualna state panga, Haryana, Rajasthan, Gujarat, Manipur leh Chhattisgarh-ah health expert team-te tirh luh an lo ni tawh bawk. 

Health ministry chuan team-te hian state-a district hrang hrang an tlawh dawn thu a tarlang a, containment thuamchakna kawng­ah te, hri darh dan enthlithlainaah te, test neihpuina kawngah te, hri laka invendan turah te leh hri dona kawnga hmalak dan tur hrang hrangah te an pui dawn tih a sawi. 

Nimin thleng khan ram pumah hri kai mek mi 4,40,962 awmin, enkawl dam tawh hi 85,21,617  an awm tawh thung a, recovery rate hi 93.69% a tling tawh a ni. Inrinni khan hri kai hmuh chhuah thar 45,209 awm belh lehin, ni 15 chhung chu hri kai hmuh chhuah thar hi 50,000 aia tlem zel an ni tawh. 

Ministry chuan state leh UT 26-ah Covid-19 kai mek chu 20,000 aia tlem an awm a, state leh UT pasariha-ah 20,000 - 50,000 inkar awmin, Maharashtra leh Kerala-ah chuan 50,000 chuang an awm mek tih a sawi.  

 Covid-19 hri lengin ziaawm lam a la pan theih loh vangin state leh khawpui hrang hrangah inkhuahkhirhna siam belh zel a ni.  

Delhi leh Noida-ah hian zan lamah curfew hman a ni a, mi panga aia tam punkhawm khap a nih theih nan Indian Penal Code-a section 144 chu Gujarat, Madhya Pradesh leh Rajasthan-ah hman a ni dawn bawk. 

Delhi : Chief minister Arvind Kejriwal chuan hri kai pun belh zel mah se khawpui pum huap chuan lockdown puan a ni dawn lo a, mahse mipui punkhawm tamna bazar hmunahte inkhuahkhirhna ṭha tawk hman a ni dawn tih a sawi. 

Delhi sorkar hian pawn chhuahnaa hmaituam vuah lote sum chawitir ṭhin chu Rs 500 aṭangin Rs 2,000-ah a tipung tawh a; khawlai chil chhak leh quarantine rules zawm lo, social distancing dan zawm lote chu Rs 2,000 chawi tir an ni bawk ang. 

Gujarat: November 20 (Zir­tawpni) aṭangin zan dar 9 aṭangin a tuk zing dar 6 thleng curfew hman a ni dawn tih Gujarat additional chief secretary (Forest and Environment) Rajiv Kumar Gupta chuan a sawi a, curfew hi thu leh awm hma chu hman tur a ni. Hri darh tur venna atan zan lam curfew puan chu thil pawimawh a ni, a ti. 

Madhya Pradesh : State chhunga khawpui lian pangaah Inrinni zan aṭang khan zan lamah curfew puan a ni tih state home minister Narottam Mishra chuan a sawi. Zan lam curfew puanna hi Bhopal, Indore, Gwalior, Ratlam leh Vidisha-te a ni. 

Noida : Inneih lawmnaa kal phalsak zat, mi 200 china bithliah chu titlemin, mi 100 aia tam kal khap a ni. 

Rajasthan: State sorkar chuan December 20 thleng awh turin mi panga aia tam pun khawm khapna, Indian Penal Code-a section 144 chu kar liamta Inrinni aṭang khan hman ṭan a ni.  

Hmai tuam lo man te chu Rs 500 chawitir an ni dawn a, hei bakah hian district pariat Jaipur, Jodhpur, Kota, Bikaner, Udaipur, Ajmer, Alwar leh Bhilwara-ah te zan lamah curfew puan a ni bawk.