UNSC-a Russia resolution siamah India-in vote thlak lo

Ukraine-a indona vanga mihring tawrhna thleng mek chungchanga Russia-in United Nations Security Council (UNSC)-a resolution a siam a vote thlak duh lo zingah India a tel a, he resolution hi Russia leh China chauhin ṭha ti lama an vote avangin a tlang lo.

India aiawh hian foreign secretary Harsh Vardhan Shringla chu New York-ah a zin a, India bakah hian ram dang 12 vote thlak lo an awm.

Russia draft resolution siamah hian Syria, North Korea leh Belarus-te chu co-sponsor an ni a, Nilaini khan Council-ah resolution pawm tura vote ngai zat a hmuh phak loh avangin a tlang zo ta lo a ni. Ram 15 awmna Security Council-ah hian Russia chuan he resolution hi a pu lut a, tlang tur chuan vote pakua hmuh a ngaih laiin vote hnih chauh a hmu ta a ni. Resolution dodal lamah vote thla awm lo mah se, member ram dangte hian a thlawp lamah pawh vote loin an hai vek a ni.

He resolution hnuaiah hian Russia chuan civil mi, humanitarian personnel leh dinhmun derthawnga ding, hmeichhia leh naupangte chu venhimna famkim pek a, him tak leh rang taka lak chhuah an nihna tura inkahhai puan a nih theihna tur an phut a ni. Mahse an resolution siamah hian Ukraine a rûn chungchang engmah a lang lo thung.

India hian UNSC leh UN General Assembly-a Russia-in Ukraine a run chungchangah resolution siamah pawh vote thlak loin a lo hai ve ve tawh bawk.

UNSC member, vote thlak lote chuan Russia resolution siam an thlawp loh chhan hi an sawifiah hlawm a, India erawh chuan engmah a sawilang lo thung. Member ram dangte chuan a beitu leh runtu zawk Russia-in Ukraine mipuite himna chungchanga resolution siampui tura a sawmna chu an pawmpui thei lo tih an sawi a ni. Ukraine beih avanga Russia demna lam resolution lo chu an thlawp dawn lo tih an sawi a ni.